Fréttir

„Ég kannast ekki við þessa síðu,” segir Sverrir Þór Sverrisson, betur þekktur sem Sveppi, en svo virðist sem óprúttin aðili fari nú um Facebook í nafni Sverris og biðji unga drengi um að verða vinir sínir.

Kim Kardashian, sem lét hafa eftir sér í apríl á þessu ári að hún sæi gríðarlega eftir því að hafa setið fyrir kviknakin í Playboy árið 2007, birtist nakin enn á ný og í þetta sinn á forsíðu W tímaritsins sem kemur út í nóvember.

„Ég held að þetta sé fyrsta íslenska ilmvatnið sem fer í almenna sölu. Það var reyndar íslensk listakona, Andrea Maack, sem bjó til ilmvatn á þessu ári og hafði það hluta af gjörningi,” segir Sigrún Lilja Guðjónsdóttir, oftast kennd við tískuvörumerkið Gyðju. Hún hyggst setja á markað ilmvatnið EFJ Eyjafjallajökull sem er framleitt úr vatni jökulsins.

Þrívegis á þessu skólaári hefur þurft að senda börn heim af leikskólum í Reykjavík vegna manneklu . Veikindi og skortur á starfsfólki hafa valdið þessu. Ingibjörg Kristleifsdóttir, formaður félags leikskólastjórnenda, segir yfirvöld ekki veita nægu fé til leikskóla. Síðast í gær voru 12 börn send heim af leiksskóla í Grafarvoginum.

Læknar í Skotlandi dreifa nú bæklingum meðal almennings þar í landi þar sem varað er við skorti á D-vítamíni.
Læknarnir hafa áhyggjur af því að Skotar fái ekki nægilegt D-vítamín frá sólarljósi og að þeir gæti ekki nægilega vel að sér að fá það sem upp á skortir í gegnum fæðuval sitt.

Danska leikkonan Brigitte Nielsen, 47 ára, er ánægð með líkama sinn sem er í það góðu formi að hún gæti hugsað sér að taka að sér að leika í spennumynd þar sem útlitið þarf að vera framúrskarandi.

Leikkonan Katie Holmes, 31 árs, hefur ekki í hyggju að eignast fleiri börn í augnablikinu því hún vill að Suri, 4 ára dóttir hennar og Tom Cruise, fái alla athygli hennar, Katie ræðir opinskátt um barneignir því stöðugar sögusagnir eru á kreiki beggja vegna Atlantshafsins um að hún sé barnshafandi.

Heilbrigðiseftirlit Reykjavíkur íhugar nú hvort ástæða sé til að skera upp herör gegn kanínum sem hreiðrað hafa um sig í Elliðaárdalnum. Kanínum þar hefur fjölgað gríðarlega síðustu ár og nú er svo komið að íbúar í dalnum, sem og útivistarfólk sem á þar leið um, hafa fengið nóg. Kanínurnar éti gróður, bæði á einkalóðum sem og í borgarlandinu, þær hafi áhrif á fuglalíf auk þess sem af þeim stafi slysahætta.

Íbúar á Klukkuvöllum í Hafnarfirði hafa ítrekað kvartað undan slæmum frágangi á byggingarlóðum í götunni. Eftir hrunið hafa húsgrunnar staðið ókláraðir, byggingarkranar eru orðin leiktæki krakkana í hverfinu og stór gryfja þar sem blokk átti að rísa er nú slysagildra við hlið leikskóla. Og fyrir ofan götuna má sjá glitta í ljósastaura og gangstéttir – en engin hús.

Verðlagseftirlit ASÍ kannaði verð á nýjum og notuðum skólabókum fyrir framhaldsskólanema í nokkrum verslunum á höfuðborgarsvæðinu í fyrradag.
Griffill var oftast með lægsta verðið á nýjum bókum í könnuninni en Penninn-Eymundsson var oftast með lægsta verðið á notuðum bókum. Mál og menning var oftast með hæsta verðið á nýjum bókum en Office 1 oftast með hæsta verðið á notuðum bókum.